MARINGAL NA PAGHAHAYAG

TUGON I:
Magalak kayong lahat sa kalangitan!
Kayong mga anghel ay mangag-awitan!
Magalak kayong lahat na mapapalad na nilikha na
Nakapaligid sa luklukang dakila.

Si Kristo ang aming Hari / ay nabuhay na mag-uli. /
Hipan natin ang tambuli / nitong ating kaligtasan! /
Magalak, O sanlibutan, / sa maningning nating ilaw! /
Si Kristo na walang maliw / ang pumaram sa dilim! /

TUGON II:
Magalak ng lubos ang buong sambayanan!
Sa kaluwalhatian lahat tayo'y magdiwang!
Sa ningning ni Hesukristo, sumagip sa sansinukob,
Siya'y muling nabuhay, tunay na manunubos!

Itaas sa kalangitan / ating puso at isipan. /
D'yos Ama'y pasalamatan / sa Anak Niyang nabuhay. /
Sapagkat tapat  S'yang tunay / sa Kanyang pananagutan, /
Para sa kinabilangan / Niya na sambayanan! (TUGON I)

Ngayon nga ang kapistahan / ni Hesukristong nag-alay /
Ng Kanyang sariling buhay, / nagtiis ng kamatayan. /
Ang minanang kasalanan, / ang dating kaalipina'y, /
Sa tubig pawang naparam, / kalayaa'y nakamtan! (TUGON II)

Ngayon nga ang pagdiriwang / ng ating muling pagsilang /
Sa tubig ng kaligtasan / na batis ng kabanalan, /
Pagka't mula sa libingan / bumangon na matagumpay /
Mesiyas ng Sanlibutan / Si Hesus nating mahal.(TUGON I)

*Diyos Ama ng sanlibutan, / tunay na walang kapantay /
Pag-ibig mo't katapatan / para sa mga hinirang. /
Handog mo'y kapatawaran / sa lahat ng kasalanan.
Higit sa lahat mong alay /si Hesus naming mahal. (TUGON II)

Dahil sa kaligayahang / sa ami'y nag-uumapaw /
Hain namin itong ilaw, / sagisag ng Pagkabuhay. /
Tunay na kaliwanagang / hatid ni Hesus na Tanglaw, /
Ang dilim ng kamatayan / ay napawi't naparam! (TUGON I)

Ang araw ng kaligtasan, si Hesus, bukang-liwayway,
Walang maliw na patnubay sa landas ng kaligtasan,
Hatid n'ya'y kapayapaan, lakas mo at pagmamahal
Upang aming magampanan aming pananagutan! (TUGON I-II)

Ending: Siya'y muling nabuhay, tunay na manunubos!